Mübariz Mənsimov 144 metrlik göydələnin ilk müştərisi oldu

“Palmali” Şirkətlər Qrupu çoxmərtəbəli binada 8 mənzil almaq istəyir
Türkiyədəki yeni göydələn “Trump Towers İstanbul-Şişli”nin ilk böyük müştərisi bu ölkədə yaşayan azərbaycanlı iş adamı, “Palmali” Şirkətlər Qrupunun prezidenti Mübariz Mənsimov olub. Lent.az-ın Doğan Xəbər Agentliyinə (DHA) istinadən verdiyi məlumata görə, Mecidiyeköydə yüksələrək İstanbulun siluetinə qatılan “Trump Towers İstanbul- Şişli”dəki “penthouse”u (xudmani ev) da satın alan Mübariz Mənsimov binanın sürətlə aparılan inşa işlərinin başa çatmasını həyəcanla gözlədiyini deyib.
Modern ofisləri olacaq Trump Towers İstanbul-Şişlidəki inşaat işlərinin isə 2011-ci ildə başa çatacağı gözlənilir.
Bina iki ayr-ayrı qüllədən ibarətdir. Onlardan biri iş mərkəzi, digəri isə rezidensiya (yaşayış yeri, iqamətgah) olacaq.
39 mərtəbəli qüllələrin hər birinin uzunluğu 144 metrdir.
M.Mənsimov rezidensiyada 8 mənzilə müştəri çıxıb.
Yeni tikilidə beşmərtəbəli alış-veriş mərkəzi, 185 mağaza olacaq.
“Trump Towers” daşınmaz əmlak sahəsində dünyanın ən böyüklərindən biri olan “Donald Trump”un Avropadakı ilk yatırımı nəticəsində yaradılıb.