Asiya İnkişaf Bankı 2011-2020-c illərlə bağlı hədəfini açıqladı

Asiya İnkişaf Bankı (AİB) 2011-2020-c illər üçün Asiya və Sakit Okean regionunun yol sektorunda davamlı yanaşma tətbiq etməyi və şəhər nəqliyyatı ilə dəmir yolları sektorunu inkişaf etdirməyi planlaşdırır. Asiya İnkişaf Bankının Azərbaycanda Daimi Nümayəndəliyindən Lent.az-a verilən məlumata görə, bu, AİB-in geniş ictimaiyyət üçün açıqladığı Davamlı Nəqliyyat Təşəbbüsü (DNT) üzrə Əməliyyat Planında məqsəd kimi qarşıya qoyulub.

DNT Asiya və Sakit Okean ölkələrində təhlükəsiz, ekoloji cəhətdən təmiz, əlverişli nəqliyyat sisteminin yaradılmasını dəstəkləyir. Yollar üçün ayrılan kreditlər tədricən davamlılığın təkmilləşdirilməsi üçün vacib olan məsələlər üzərində cəmləşəcək. Əhəmiyyətli dəyişikliklərdən biri də o olacaq ki, 2020-ci ilə qədər yollar üçün ayrılan kreditlər aparılan əməliyyatların geniş hissəsi kimi qalsa da, digər nəqliyyat sektorları üçün daha çox vəsait ayrılacaq. DNT-yə uyğun olaraq, AİB hər il Asiya və Sakit Okean regionunda nəqliyyat sektoruna 3-4 milyard dollar həcmində sərmayə qoyacaq.

Davamlı nəqliyyat sektoruna geniş dəstək vermək üçün AİB şəhər nəqliyyatı, nəqliyyat sektorunda ətraf mühitin qorunması, transsərhəd nəqliyyat və loqistika məsələləri, yol təhlükəsizliyi və sosial davamlılıq daxil olmaqla, 4 istiqamət müəyyən edib.