Fermerlər istehsalçı müəssisələrlə bir araya gəldi
02 noyabr 2009 16:45 (UTC +04:00)

Fermerlər istehsalçı müəssisələrlə bir araya gəldi

Ağcabədidəki kənd təsərrüfatı sərgisi fermerlər üçün müsbət nəticələr vəd edir

Kənd təsərrüfatı işçiləri günü münasibətilə Ağcabədidə kənd təsərrüfatı sahələrini əhatə edən sərgi keçirilib. “Aqro” İnformasiya Mərkəzinin dəstəyilə keçirilən tədbirdə ətraf şəhər və rayonlardan fermer təsərrüfatlarının, icra hakimiyyətləri orqanlarının nümayəndələri, yerli və beynəlxalq qurumların təmsilçiləri də iştirak edib.

Kənd Təsərrüfatı Nazirliyindən Lent.az-a bildiriblər ki, tədbirin əsas məqsədi fermerləri yeni texnologiyalarla tanış etmək, onları müasir metodlarla işləməyə həvəsləndirməkdir. Sərgidə regionda fəaliyyət göstərən fermer təsərrüfatlarının nümayəndələri yeni texnologiyalarla tanış olublar. Onlar həmçinin informasiyaya çıxış imkanlarını yaxşılaşdırmaq, suvarma sistemində işin səmərəli təşkilinə nail olmaq barədə fikir mübadiləsi aparmaq imkanı qazanıblar.

Nazirlikdə bildirirlər ki, sərgi çərçivəsində keçirilən görüşdə yerli və xarici təşkilatların nümayəndələri fermerlər öz xidmətlərini də təklif ediblər. Bu xidmətlər əsasən, yerlərdə fəaliyyət göstərən emal sexlərinin fermerlərlə əməkdaşlığının qurulması məqsədi daşıyır. Belə ki, bundan sonra emalçılar məhsul istehsalı zamanı xammal kimi fermerlərin topladığı məhsullardan istifadə edəcəklər.

Xatırladaq ki, regionlarda ilk dəfə keçirilən bu sərgidə 100-dən artıq fermer təsərrüfatlarının nümayəndələri iştirak edib.

Elxan SALAHOV
# 208

Oxşar yazılar