“Parabank” təqaüdçülər üçün yeni bank xidməti göstərəcək

“Parabank” Səhmdar Cəmiyyəti “Təqaüdçü Əmanəti” adlı yeni bank xidməti göstərməyə başlayıb. Təqdim olunan yeni xidmət əhalinin ehtiyaclarını nəzərə alaraq sərfəli əmanət növünün tətbiqini nəzərdə tutur.

Bankdan Lent.az-a bildiriblər ki, “Təqaüdçü Əmanəti” təqaüdə çıxmış vətəndaşlara qayğı məqsədilə yaradılıb. Zəhmətkeş əmanətinə vəsait yerləşdirmək üçün vətəndaşlar şəxsiyyət vəsiqələrini və təqaüdçü kitabçalarını təqdim etməlidirlər. Bu əmanət növündə əsas məqsədi təqaüdçülərin gəlirlərini daha da artırmaq və bütün ömürlərini dövlətçiliyin inkişafına həsr etmiş şəxslərin sağlamlığını qorumaqdır.

Bu əmanət növünə əmanət yerləşdirən təqaüdçülər il ərzində yatırdıqları vəsaitlərini 17,5 faiz (Azərbaycan manatı ilə ) və ya 18,5 faiz (ABŞ dolları ilə) artıra bilərlər. "Təqaüdçü Əmanəti" minimum məbləğ 200 manat və ya ABŞ dolları təşkil etməklə 6, 9, 12 ay müddətlərinə qəbul edilir. Bundan əlavə əmanət yerləşdirən təqaüdçülər həyati sığorta əldə edə biləcəklər.

Xatırladaq ki, bu əmanət növü aprelin 1-dən təqaüdçülərin istifadəsinə verilib.

Elxan SALAHOV