AFFA rəhbərliyi Tovuzun “Turan” klubundan içkiyə meylli olduğu üçün kənarlaşdırılmış Andrey Popoviçi geri qaytarmağı xahiş edib. Lent.az-ın məlumatına görə, bu barədə jurnalistlərə qurumun baş katibi Elxan Məmmədov açıqlama verib.
O bildirib ki, Tovuz təmsilçisinin rəhbərliyindən Ukrayna əsilli qapıçıya bir daha şans verilməsini istəyib: “Popoviç 17 yaşlılardan ibarət yığmamızdan əsas millimizədək yol qət edib. Hazırda cəmi 20 yaşı var. Onu belə erkən yaşda itirmək istəmirik. Ona görə də “Turan” rəhbərliyi ilə görüşümdə qapıçıya bir daha şans verilməsini xahiş etdim”.
Məmmədovun sözlərinə görə, “Turan” rəhbərliyi də bu xahişi nəzərə alaraq, Popoviçi klubun ofisinə dəvət edərək, söhbət aparıb. Baş katib qapıçı ilə bağlı problemin müsbət həll olunacağına inam ifadə edib: “Eyni hal bir daha təkrarlansa, məsuliyyət Popoviçin üzərinə düşəcək”.
Qeyd edək ki, Andrey Popoviç əvvəllər də içkiyə meylli olduğunu açıq-aşkar büruzə verib. O, ilin əvvəllərində Azərbaycan millisinin Dubay toplanışı zamanı komanda yoldaşlarının əhatəsində siqaret və içki ilə birgə şəkillər çəkdirərək, sosial şəbəkələrdən birində paylaşıb.
Bizi Telegram-da izləyin
t.me/lent_az
Bizi Instagram-da izləyin
Bizi Facebook-da izləyin
Bizi Twitter-da izləyin
