“Bakı”ya 500 min dollarlıq mükafat vədi

“Levski”ni keçəcəyi halda ikiqat Azərbaycan çempionuna mükafat veriləcək

Bolqarıstanın “Levski” klubunu Çempionlar Liqasının III təsnifat mərhələsindən kənarlaşdıracağı təqdirdə, “Bakı” futbol komandasına görünməmiş məbləğdə mükafat veriləcək. Lent.az-ın "7 dni sport" qəzetinə istinadən verdiyi məlumata görə, ikiqat Azərbaycan çempionunun rəhbərliyi 500 min dollar mükafat vəd edib.

Qəzet yazır ki, “Bakı”nın baş məşqçisi Qyoko Hacievski vaxtilə “Levski” ilə düşmən kimi münasibətdə olan Bolqarıstanın MOİK klubunu çalışdırıb. Müdafiəçi Aleksandr Tomaş və yarımmüdafiəçi Amiran Muciri də əvvəllər MOİK-də çıxış edib. Hacievskini ambisiyalı mütəxəssis kimi dəyərləndirən həmkarlarımız makedoniyalı baş məşqçinin yetirmələrini Avropa Liqasının qrup mərhələsində mübarizə aparmağa köklədiyini iddia edib.

Bu gün Tofiq Bəhramov adına Respublika stadionunda keçiriləcək “Bakı” – “Levski” matçı saat 20:00-da başlanacaq. Stadiona giriş pulsuzdur. Litva “Ekranas”ı ilə Çempionlar Liqasının II təsnifat mərhələsinin cavab görüşündə olduğu kimi, matçı 30 minədək tamaşaçının izləyəcəyi gözlənilir.