Gözəl qızlarla əlbir olub oğlanları tora salan azərbaycanlı sahibkar TUTULDU - VİDEO

Rusiyanın Sankt-Peterburq şəhərinin Petroqradski rayonunda restoranın həmtəsisçisi və cinayət sxeminin müəllifi olduğu iddia edilən şəxs həbs edilib.

Lent.az yerli mediaya istinadla bildirir ki, ötən il dekabrın 30-da 24 yaşlı gənc polisə müraciət edib. Yeni il qabağı o, Dobrolyubov prospektindəki restorana görüşə gedib. Onu tanışlıq saytından tapdığı qız müşayiət edib. Xanım cütlüyün gedəcəyi müəssisəni seçib.

Axşam isə oğlan 54.200 rubl məbləğində gözlənilməz hesabla qarşılaşıb.O, məcburiyyətdən hesabı ödəyib. Hüquq-mühafizə orqanlarının əməkdaşları dələduzluq maddəsi ilə iş açıb.

Polis əməkdaşları araşdırma zamanı müəyyən ediblər ki, restoranı ötən ilin noyabrında Sankt-Peterburq universitetlərindən birinin 20 yaşlı tələbəsi - Azərbaycan vətəndaşı açıb. Hüquq-mühafizə orqanlarının əməkdaşları hesab edirlər ki, oğlan "gözəl qızların" köməyi ilə oğlanları ora cəlb etmək və aldatmaq üçün açıb.

Məlum olub ki, restoranla əlbir olan qızlar sosial şəbəkələrdə gənclərlə tanış olub, özlərini varlı valideynləri olan varlı xanımlar kimi təqdim ediblər.

İstintaq zamanı polis qızların sifarişləri üçün 30-105 min rubl məbləğində pul ödəyən daha altı aldadılmış restoran müştərisi barədə əməliyyat məlumatı əldə edib.

“Restoran biznesi”nin təşkilatçısı olduğu iddia edilən şəxs öz müəssisəsində saxlanılıb. Dörd qız şahid qismində dindirilib. Onlardan ikisi 19 yaşlı yerli sakin, digərləri İvanovo vilayətindən olan 22 yaşlı və Vladimir vilayətindən olan 23 yaşlı qızlardır.

“Cinayət sxemində iştirak edən digər şəxslər müəyyən edilir. Polisin istintaqının tələbi ilə qanunsuz sxemin təşkilatçısı saxlanılıb”, - deyə polisin mətbuat xidməti yekunlaşdırıb. Əməliyyat-istintaq tədbirləri davam etdirilir.