Bir aya azadlığa çıxacaqdı, yeni hökm oxundu - SUMQAYITDA

Sumqayıtda həbsxanaya narkotik gətirən məhkuma yeni hökm oxunub.

Lent.az-ın əldə etdiyi məlumata görə, Sumqayıt şəhərində cəzaçəkmə müəssisələrindən birində cəza çəkən K. Nəcəfov uzunmüddətli görüşdən qayıdandan sonra şalvarının sağ cibindən 1.53 qram qurudulmuş marixuana aşkarlanıb.

Bu əməlinə görə, onun barəsində Cinayət Məcəlləsinin 317.-2.1-ci (Cəzaçəkmə müəssisələrində və ya istintaq təcridxanalarında saxlanılan şəxs tərəfindən qadağan olunmuş əşyaların hazırlanması, saxlanılması, gəzdirilməsi, daşınması və ya istifadəsi ) maddəsilə yeni ittiham élan olunub. Sumqayıt şəhər Məhkəməsinin qərarı ilə onun həbs müddəti 5 ay daha artırılıb.

Məlumata görə, K. Nəcəfov 2019-cu ildə Şəki Ağır Cinayətlər Məhkəməsinin hökmü ilə 6 il müddətinə azadlıqdan məhrum edilib. Belə ki, məhkum 1 ay 6 gün sonra azadlığa çıxacaqmış.