Bakıda müəllimi ölümlə hədələyən taksi sürücüsü işdən çıxarıldı - VİDEO - YENİLƏNİB

Daxili İşlər Nazirliyi Bakıda qadının "Uber" taksi xidmətinin sürücüsü tərəfindən ölümlə hədələnməsinə münasibət bildirib.

Nazirliyin mətbuat xidmətinin şöbə rəisi Elşad Hacıyev Lent.az-a açıqlamasında qeyd edib ki, yayılan görüntülərlə bağlı araşdırmalara başlanıb:

"Ayşən Qurbanovanın sosial şəbəkələrdə yayılan görüntüləri ilə bağlı polis əməkdaşları tərəfindən müvafiq araşdırma aparılıb və taksi sürücüsü müəyyən olunub. Lakin, zərərçəkmiş şəxs qismində özünü təqdim edən xanım hər hansısa şikayətinin olmadığını bildirib. Əlavə araşdırmaların aparılmaması ilə bağlı bizdən xahiş edib.

O, bildirib ki, bununla bağlı hər hansı rəsmi şikayəti yoxdur".

Bundan əlavə, "Tiktok" fenomeni Ayşən Qurbanova öz "Instagram" hesabında "Uber" taksi xidmətinin ona göndərdiyi mesajı paylaşıb:

"Sürücü artıq sifarişlərdən kənarlaşdırılıb və sizin müraciətinizdən dərhal sonra məlumat sürücünün qeydiyyatda olduğu taksi parkına göndərilib. Biz tətbiq üzərindən olan sifarişlərin komfortlu və təhlükəsiz olması üçün bütün lazımi tədbirləri görəcəyik".

***

Saat 13:25

Sosial şəbəkələrdə yayılan, bir qadının "Uber" taksi xidmətinin sürücüsü tərəfindən ölümlə hədələndiyini iddia etdiyi video aləmi bir-birinə vurub.

Lent.az xəbər verir ki, "Tik-Tok" fenomeni olan ingilis dili müəlliməsi Ayşən Qurbanova dünən başına gələn hadisəni öz "Instagram" hesabında paylaşıb.

O deyir ki, sürücü tərəfindən təhqir və təhdid olunub:

"Bir neçə gün əvvəl "Uber" taksidən istifadə etdim və sürücü mənə arxa oturacaqda makiyaj etdiyim üçün "Sən tərbiyəsizsən, əxlaqsızsan. Sən makiyaj edə bilmərsən kişi xeylağının yanında. Səni maşından düşürdərəm yolun ortasında, başını kəsərəm. sənin başını əzərəm" və s. bu tipli sözlər dedi.

Bunların hamısını videoya çəkdim, daha sonra həmin sürücünü şikayət etdim. "Uber"ə də şikayət ünvanladım. Mənə biz o sürücünün işi ilə bağlı məhdudiyyət qoyacağıq, nəsə edəcəyik. Çox üzr istəyirik dedilər. Sürücünü işdən çıxarmaq yox, onu etdiyi davranışa görə cəzalandırmaq yox, məndən normal üzr istəmək yox.

Həmin sürücünün maşınına bu gün, sabah başqa bir xanım əyləşsə və həqiqətən də, dediyi kimi onun başını kəssə, ya da yolun ortasında döysə, heç kim yaxınlaşıb kömək etməyəcək. "Uber"dən istifadə edirsinizsə, ucuzdur deyə, sifariş etməyin".

Məsələ ilə bağlı Daxili İşlər Nazirliyinin Mətbuat Xidmətindən Nurlan Əliyev Lent.az-a bildirdi ki, sosial şəbəkələrdə yayılan görüntülərdən məlumatımız var və məsələ araşdırılır.