Akademiyadakı KÜTLƏVİ İXTİSARLA bağlı rəsmi açıqlama - YENİLƏNİB

Azərbaycan İdman Akademiyasından 100-ə yaxın işçinin vəzifəsindən azad edilməsi ilə bağlı məsələyə münasibət bildirilib.

Lent.az-ın məlumatına görə, qurumdan bildirilib ki, akademiyanın publik hüquqi şəxsə çevrilməsi ilə bağlı qərar verildikdən sonra bir sıra silsilə islahatların tətbiqinə başlanılıb:

"Bildiyiniz kimi, Nazirlar Kabineti 13 may 2024-cü il tarixində "Azərbaycan Dövlət Bədən Tərbiyəsi və İdman Akademiyasının yenidən təşkili və Nizamnaməsinin təsdiq edilməsi haqqında" qərar verib və Azərbaycan İdman Akademiyası publik hüquqi şəxsə çevrilib.

Bunu əsas tutaraq, Azərbaycan İdman Akademiyası öz təhsil strategiyasını daha da təkmilləşdirilmək və qısa vaxt ərzində müasir beynəlxalq standartlara nail olmağı qarşısına hədəf olaraq qoyub. Bunun üçün bir sıra silsilə islahatların tətbiqinə başlanılıb".

Həmçinin qurumdan əlavə edilib ki, akademiyanın inzibati heyətinin müasir tələblərə uyğunlaşdırılması prosesi hazırda davam etdirilir:

"Bir neçə mərhələdən ibarət olan islahatlara eyni zamanda Akademiyanın inzibati heyətinin formalaşdırılması da daxildir. Belə ki, hazırda Azərbaycan İdman Akademiyasının inzibati heyəti müasir tələblərə uyğun olaraq, tərəfsiz münsiflərin də iştirakı və videoqeydiyyat prosesi olmaqla fərdi müsahibələr əsasında təşkil edilir. Müsahibəni uğurla keçənlərə müvafiq vəzifələr təklif edilir.

İnanırıq ki, tezliklə idman ictimaiyyəti akademiyanın ölkənin idman siyasətinin tələbinə uyğun olaraq peşəkar idmanın inkişafı üçün həyata keçirmiş olduğu bu islahatlarının müsbət nəticələrinin şahidi olacaq".

***

8 yanvar, saat 23:27

Azərbaycan İdman Akademiyasında 100-ə yaxın işçi vəzifəsindən azad edilib.

Lent.az xəbər verir ki, ixtisar ötən ay baş verib.

Dekabr ayının 30-u bir qrup şəxs işdən çıxarılıb. Məlumatda bildirilir ki, ixtisarların davam edəcəyi gözlənilir.

İşdən çıxarılanlar arasında vəzifəli şəxslər də var.(Oxu.az)