”Yəhova şahidləri” Hidayət Orucovu məhkəməyə verib - EKSKLÜZİV

İcma “Vəzifəli şəxsin qeyri-qanuni hərəkətindən şikayət” edib

Azərbaycanda fəaliyyət göstərən ”Yəhova şahidləri” dini icması Dini Qurumlarla İş üzrə Dövlət Komitəsinin sədri Hidayət Orucovu məhkəməyə verib. Lent.az-ın məlumatına görə, bu gün Azərbaycan Ali Məhkəməsində baş tutmalı olan məhkəmə prosesi təxirə salınıb.

İcma Səbael rayon Məhkəməsinə “Vəzifəli şəxsin qeyri-qanuni hərəkətindən şikayət” iddiası ilə müraciət edib. Belə ki, dini icmanın ölkəyə gətirdiyi dini ədəbiyyatlarla bağlı Dini Qurumlarla İş üzrə Dövlət Komitəsinin Ekspertiza şöbəsində mənfi rəy verilib. Bundan sonra həmin ədəbiyyatların yayılması və satışına qadağa qoyulub, bütün kitablar yığışdırılıb. İcma bunun qanunsuz olduğunu iddia edərək Komitə sədrindən məhkəməyə şikayət edir. İcma kitabların geri qaytarılmasını və onlarla bağlı qoyulan qadağanın götürülməsini istəyir.

Səbael rayon Məhkəməsi icmanın iddiasını təmin etməyib. Daha sonra icma Bakı Apelyasiya Məhkəməsinə müraciət edib. Həmin məhkəmə də birinci instansiya məhkəməsinin qərarını qüvvədə saxlayıb.

Qeyd edək ki, ”Yəhova şahidləri” dini icması Azərbaycanda dövlət qeydiyyatından keçib. Lakin “Dini etiqad azadlığı haqqında” qanuna edilən əlavə və dəyişiklik təsdiqləndikdən sonra yeni qanunvericiliyə uyğun olaraq ölkədəki bütün dini icmalar yenidən qeydiyyata alınacaq.

Pərvin ABBASOV