“Təzadlar” qəzetinin baş redaktoru Asif Mərzili həbs edildi

Qəzetin xanım əməkdaşı da cəzalandırılıb

Bu gün Yasamal rayon Məhkəməsində Azərbaycan Beynəlxalq Universitetinin rektoru Elşad Abdullayev, ABU-nun birinci prorektoru Hüseyn Əhmədov və ABU-nun müəllimi Eldəniz Abdullayevin “Təzadlar” qəzetinin baş redaktoru Asif Mərziliyə və jurnalist Zümrüd Məmmədovaya qarşı xüsusi ittiham qaydasında şikayətinə baxılıb.

Məhkəmədən APA-ya verilən məlumata görə, hakim Tahir İsmayılovun sədrliyi ilə keçirilən prosesdə A. Mərzilinin 1 il həbs cəzasına, ittiham tərəfinin fəaliyyəti ilə bağlı adıçəkilən qəzetdə gedən yazının müəllifi Zümrüd Məmmədovanın isə 1 il islah işlərinə cəlb olunması barədə cəzaya məhkum edilməsi haqda qərar çıxarılıb.

Qeyd edək ki, Azərbaycan Beynəlxalq Universitetinin (ABU) rektoru Elşad Abdullayev, ABU-nun birinci prorektoru Hüseyn Əhmədov və ABU-nun müəllimi Eldəniz Abdullayev qəzetdə dərc olunan bəzi məqalələrdə ABU-nun rektoru və təhsil müəssisəsi haqqında həqiqətə uyğun olmayan yazıların getdiyini əsas gətirirlər.