Skinxedlər “AzerRos”un vitse-prezidentinin oğlunu döyüblər

Rusiyada Azərbaycanlıların Federal Milli-Mədəni Muxtariyyətinin (AzerRos) vitse-prezidenti Mehriban Sadıxovanın oğlu, 1991-ci il təvəllüdlü Rafael Sadıxov dünən axşam radələrində yaşadığı evin yaxınlığında bir qrup şəxs tərəfindən döyülüb.

Mehriban Sadıxovanın APA-nın Moskva bürosuna verdiyi açıqlamaya görə, oğlunu döyən şəxslər “qaraları öldür, onları məhv elə” kimi şüarlar səsləndiriblər ki, bu da cinayətin milli zəmində baş verdiyini təsdiqləyir: “Mən dərhal baş verən hadisə ilə Kotlovka daxili işlər şöbəsinə müraciət elədim. Cinayətkarlardan üçünü həmin gün həbs elədilər və Rafael Sadıqov üzləşmə zamanı onları tanıdı. Məlum oldu ki, həmin gün onlar təkcə oğlumu deyil, daha bir neçə nəfəri, o cümlədən Tacikistan vətəndaşını milli zəmində döyüblər”.

“AzerRos” bununla bağlı bu gün Moskva şəhər daxili işlər idarəsinin rəisi, general-mayor Vladimir Proninə müraciət eləyərək hadisənin təhqiqatının öz nəzarətinə götürməyi xahiş eləyib.