Yanğında ölənlərin ailəsini ələ salanlar HƏBS OLUNDU

Türkiyənin Kartalkaya bölgəsində yerləşən "Grand Kartal" oteldində baş verən yanğında həyatını itirənlərin yaxınlarına zəng vuran, onları ələ salan, söyən, bu videoları sosial şəbəkədə paylaşanlara qarşı İstanbul şəhər Prokurorluğunun başlatdığı istintaqda 2 nəfər həbs edilib.

Lent.az-ın məlumatına görə, bəziləri "Teleqram" vasitəsilə əlaqə saxlayaraq yanğında yaxınlarını itirənlərin şəxsi məlumatlarına və telefon nömrələrinə daxil olublar. Sonra onlar skayp vasitəsilə ölənlərin yaxınlarına zəng edərək onları ələ salıb, təhqir edib və lentə alınan bu söhbətləri sosial şəbəkədə paylaşıblar.

İstanbul şəhər Prokurorluğu bu paylaşımları paylaşan şəxslərə qarşı “qanunsuz olaraq şəxsi məlumatların əldə edilməsi”, “şəxsin xatirəsinin təhqir edilməsi” və “ictimaiyyəti nifrət və düşmənçiliyə sövq etmək” cinayətlərinə görə istintaqa başlayıb. İstintaq çərçivəsində saxlanılan şübhəlilərdən 2-si həbs edilib, 1-i isə məhkəmə nəzarəti şərti ilə sərbəst buraxılıb. Hadisənin əsas səbəbkarları olduğu bildirilən 4 azyaşlı şübhəlinin saxlanılması prosesi davam edir.

İstintaq komissiyası yaradılıb

Türkiyə Böyük Millət Məclisində qrupları olan siyasi partiyalar Bolu Kartalkayadakı “Grand Kartal” otelində baş verən yanğın fəlakətinin bütün aspektlərinin araşdırılması, aidiyyatı qurum və təşkilatların məsuliyyətinin müəyyən edilməsi və oxşar hadisələrin qarşısının alınması üçün TBMM-ə araşdırma tələbi ilə təkliflər veriblər. Təkliflərlə bağlı müzakirələr başa çatdıqdan sonra “Grand Kartal” baş vermiş yanğın fəlakətini bütün ölçüləri ilə həll etmək üçün səsvermə yolu ilə parlamentin İstintaq Komissiyası yaradılıb.