Hava limanında cinsi orqanları göstərən cihaz!

İngilislər hava limanlarında “X-ray” cihazının quraşdırılmasından narazıdırlar
Səfərə gedənlərin bədənlərini ekranda çılpaq göstərə bilən “X-ray” cihazı İngiltərənin Mançestr Hava Limanında quraşdırılıb.
Lent.az-ın Türkiyə mediasına istinadən verdiyi məlumata görə, cihazın sərnişinlərin cinsi orqanlarını ağ-qara rəngdə, o cümlədən bədənə taxılmış silikonları dəqiqliklə göstərməsi mübahisələrə yol açıb.
Hava limanının müştərilərlə əlaqələr üzrə nümayəndəsi Sara Barrett deyib ki, sərnişinlərin bədənlərinin ağ-qara görüntüləri uzaqda qurulmuş ekrana ötürüləcək, qısa müddətdən sonra da silinəcək. Onun sözlərinə görə, bu cihazın qarşısına keçmək istəməyən sərnişinlər ənənəvi qaydada yoxlanılmalarını da istəyə bilərlər.
“X-ray” cihazının qiyməti 80 min sterlinqdir. Bu cihaz elektromaqnit dalğaları vasitəsilə insanın üç ölçülü görüntüsünü çıxarır. Sara Barrett bildirib ki, hər bir insan ildə 5 min dəfə bu cihazdan keçsə də, radiasiya təhlükəsinə məruz qalmayacaq, çünki elektromaqnit dalğaları zəifdir.
Qeyd edək ki, “RapiScan” adlı şirkətin istehsal etdiyi “X-ray” cihazları Nyu-York, Los-Ancels və Heathrov hava limanlarında 2004-cü ildən istifadə edilir.