Bir ölkə Həcc ziyarətindən imtina etdi

Tunis belə qərar qəbul edən ilk ərəb ölkəsi oldu

“Donuz qripi” təhlükəsi müsəlmanları müqəddəs Həcc ziyarətindən imtina etməyə məcbur edir. Lent.az-ın Rusiya mediasına istinadən məlumatına görə, artıq Tunis bu təhlükə səbəbindən Həcc ziyarətindən imtina edib. Qeyd edək ki, bununla Tunis ərəb ölkələri arasında Həccdən imtina edən ilk ölkə oldu.

Ölkənin dini işlər üzrə naziri bildirib ki, bu qərar “donuz qrpip” əleyhinə vaksinin çatışmazlığı səbəbindən qəbul olunub. Belə ki, Səudiyyə Ərəbistanı hökuməti Həcc ziyarətindən əvvəl zəvvarların peyvənd edilməsini məcburi sayır.

Xatırladaq ki, bir müddət əvvəl bəzi ərəb ölkələri qadın, uşaq və qocalara bu il ziyarətə getməməyi tövsiyə etmişdi. Nüfuzlu dini liderlərdən olan ayətulla Hüseyn Fədlallah da bəyan edib ki, Həcc ziyarəti zamanı H1N1 virusuna yoluxmaqdan ehtiyatlananlar bu il evlərində qala bilərlər.