Ermənistanda ərzaq həyəcanı

Məhsullar bir neçə saat ərzində bahalaşıb və satılıb qurtarıb

Ermənistanın ərzaq mağazalarında və supermarketlərində panika başlayıb. Lent.az-ın “Kavkazskiy uzel”ə istinadən verdiyi məlumata görə, əhali nisbətən ucuz mallar almaq üçün böyük növbələrə düzülüb. Milli valyutanın – dramın 1 saat ərzində 15 faiz ucuzlaşması bəzi ərzaq məhsullarının qiymətinin də 10-20 və hətta 50 faiz bahalaşmasına gətirib çıxarıb.

Hələ dünən səhər bitki yağının 1 litri 530 dram olub. Üstündən bir neçə saat keçəndən sonra qiymət birdən-birə 700 və hətta 1000 drama qədər qalxıb. Kərə yağı 1650 dramdan 2000 drama, şəkər tozu 220 dramdan 260-280 drama qədər bahalaşıb.

Bir çox mağazalarda şəkər, qənd, qarabaşaq və digər ərzaq məhsulları qurtarıb. Satıcılar bildirirlər ki, dolların bahalaşması ilə bağlı narahatlıq keçirən insanların qiymətlərin daha da bahalaşacağından qorxaraq mağazalara axışırlar.