İsrail ordusunun komandanı Türkiyədən üzr istədi

İsrail Silahlı Qüvvələrinin Baş Qərargah rəisi Qabi Aşkenazi türkiyəli həmkarından üzr istəyib.
Lent.az-ın Türkiyə mətbuatına istinadən məlumatına görə, bu barədə Türkiyə Silahlı Qüvvələri Baş Qərargahının ictimaiyyətlə əlaqələr şöbəsinin rəhbəri, general Mətin Gürak bildirib. Mətin Gürak deyib ki, Qabi Askenazi fevralın 16 da İlkər Başbuğa zəng edib. İsrailli komandan ölkəsinin Quru Qoşunları komandanı Avi Mizrahinin sözlərinə görə İlkər Başbuğdan üzr istəyib və üzr məktubu göndərdiyini söyləyib.
O, Avi Mizrahinin mövqeyinin İsrailin mövqeyi olmadığını vurğulayıb və lazımi ölçünün götürüləcəyini bildirib.

Qeyd edək ki, Avi Mizrahi Türkiyənin baş naziri Rəcəb Tayyib Ərdoğanın Davosda İsrailin ünvanına səsləndirdiyi sərt bəyanata münasibət bildirərkən “Ərdoğan güzgüyə baxsın” deyib. İsrailli general Türkiyənin erməniləri və kürdləri soyqırıma məruz qoyduğunu iddia edib. Türkiyə Silahlı Qüvvələrinin Baş Qərargahı isə İsrail ordusundan genralın sözləri ilə bağlı izahat istəyib.