Türkiyədən ermənilərə daha bir güzəşt

Nevşəhər Universitetindən sonra Erciyes Universitetində də erməni dili şöbəsi açılacaq

Türkiyənin Kayseri şəhərindəki Erciyes Universitetində erməni dilində şöbə açılacaq.
Lent.az-ın Türkiyə mətbuatına istinadən məlumatına görə, ölkənin Yüksək Öyrənim Qurumu (Tələbə Qəbulu üzrə Dövlət Komissiyası) Nevşəhər Universitetindən sonra Erciyes Universitetində də erməni şöbəsinin açılmasına icazə verib.
Hər iki ali təhsil ocağında erməni dilinin öyrənilməsi təşəbbüsünü Erciyes Universitetinin müəllimi, professor Mətin Hülagi irəli sürüb. M.Hülagi hazırlıqlar başa çatdıqdan sonra 2009-2010-cu tədris ilində ali məktəbdə erməni dilinin tədrisinə başlanacağını deyib.
Nevşəhər Universitetinin rektoru, professor Filiz Kılıc ötən il icazə verilməsinə baxmayaraq, ali məktəbdə erməni şöbəsinin açılmasının mümkün olmadığını deyib.
“Türkiyədə erməni dilində bilən müəllim tapa bilmədik. Buna görə şöbə hələ də fəaliyyətə başlamayıb. İndi Azərbaycanda müəllim axtarırırq”, - deyə F.Kılıc bildirib.