Misir ordusu xəbərdarlıq etdi: «Zorakılığa dözən deyilik»

Misirdə prezident Məhəmməd Mursinin tərəfdarları ilə əleyhdarları arasında qarşıdurmaya ara verilməyib.

Lent.az-ın xarici informasiya vasitələrinə istinadən məlumatına görə, müxalifət yeni Ana Yasa layihəsi ilə bağlı referendumun keçirilməsinin təxirə salınmasını tələbə edirsə, «müsəlman qardaşları» hərəkatı həmin siyasi kampaniyanın təyin olunmuş vaxtda, dekabrın 15-də keçirilməsinə israr etməkdədir.

«Müsəlman qardaşları» və başqa islamçı qurumların daxil olduğu koalisiya müxalifətin mübahisəli konstitusiyaya dair dekabrın 15-i referendumun təxirə salınması tələblərini rədd edib.

Müsəlman qardaşları hərəkatının yüksək səviyyəli nümayəndəsi Xayart əl-Şater referendumun təxirə salınmadan və heç bir dəyişiklik edilmədən müəyyən edilmiş vaxt keçirilməli olduğunu deyib.

Üçüncü həftədir ölkədə siyasi böhran davam edir. Məhəmməd Mursi müxalifəti əhatəli dialoqa çağırıb.

Müxalifət liderləri prezidentin mübahisələrə səbəb olmuş fərmanı və konstitusiya layihəsi üzrə referendum ləğv edilmədiyi təqdirdə onunla müzakirələrdə maraqlı olmadıqlarını bildiriblər.

Misirin silahlı qüvvələri siyasi fikir ayrılıqlarına son qoyulması üçün dialoqa dəstək verdiyini bildirib. Silahlı qüvvələrin sözçüsü razılığın əldə edilməsi üçün dialoqun yeganə və ən yaxşı yol olduğunu deyib.

Belə bir durumda ordu rəhbərliyi onu da bildirib ki, hərbçilər ölkədəki zorakılığa dözmək niyyətində deyillər.