İvanişvili Rusiyanın davranışından məyusdur

Gürcüstan baş naziri Bidzina İvanişivli Rusiya ilə münasibətlərin normallaşdırılması üçün xüsusi nümayəndənin təyinatına Moskvanın reaksiyasından məyus olub.

Lent.az-ın «BBC»-yə istinadən məlumatına görə, o, bu haqda Avropa Birliyi komissiyasının başçısı Joze Manuel Barrozu ilə Brüsseldə keçirdiyi birgə brifinqdə bu açıqlamanı verib.

Hökumət başçısı bildirib ki, Zurab Abaşidzenin bu vəzifəyə təyin olunması Rusiya ilə münasibətlərin qaydasına salınması üçün çox vacib addımdır. Ancaq Kremlin təyinata ilk münasibəti baş naziri məyus edib:«Biz gözləyir və inanırq ki, Rusiya hakimiyyəti gələcəkdə məsələni təhlil edib, uyğun addımlar atacaq. Bu məsələni yubatmaq, iki dövlət arasında mövcud münasibət nə Rusiya, nə də Gürcüstan üçün arzu edilən deyil. Biz dövlətlərimiz arasında olmuş tarixi əlaqələri bir yolla yaxşılaşdırıb, inkişaf etdirməliyik».

Xatırladaq ki, baş nazirin məsələ ilə bağlı özəl təmsilçisinin təyinatına Rusiya tərəfi cavab olaraq, bildirib ki, ilk növbədə onlar Gürcüstandan «konkret praktik addımlar atmasını gözləyirlər».