Livan qarışdı

Livan paytaxtı Beyrutda baş vermiş partlayış ölkədə siyasi gərginliyi də artırıb.

Lent.az-ın məlumatına əsasən, müxalifət hizbullahyönlü baş nazir Nəcib Mikatinin istefa verməsi tələbini irəli sürüb. Baş nazir isə istefa verməyəcəyini bəyan edib və prezident Mişel Süleymanın ondan daha bir müddət hökumətə başçılıq etməsini istədiyini deyib.

Müxalifət Nəcib Mikatinin başçılıq etdiyi hökumətin istefası tələbi ilə Beyrutda müddətsiz aksiyalar keçirəcəyini elan edib. Etiraz aksiyasında Suriya ilə sərhəddə sülhməramlı qüvvələrin yerləşdirilməsi və bu ölkə səfirinin Livandan qovulması tələb olunacaq.

Baş vermiş partlayışa görə isə livanlıların çoxu Suriya hakimiyyətini qınayır.

Xatırladaq ki, həmin terror aksiyası nəticəsində 8 nəfər, o cümlədən kəşfiyyat idarəsinin başçısı əl-Həsən həlak olub, 80-ə yaxın dinc sakin yaralanıb.