Yol polisindən ÇAĞIRIŞ:  "Maşının ətrafında 360 dərəcə fırlanın"
26 noyabr 2021 13:35 (UTC +04:00)

Yol polisindən ÇAĞIRIŞ: "Maşının ətrafında 360 dərəcə fırlanın"

Havalar get-gedə soyuduğu üçün sahibsiz küçə heyvanları, xüsusən də, pişiklər isti yer tapmağa çalışırlar. Bunun üçün onlar ən çox məhz avtomobillərin altı, mühərrikxana, təkərin üstü və s. yerləri seçirlər. Dəfələrlə sosial şəbəkələrdə bununla bağlı görüntülər paylaşılaraq, insanlara bilgilər verilib. Həmin foto və videolar da izləyicilər tərəfindən müsbət qarşılanıb və izləyicilər sürücülərə diqqətli olmağı məsləhət görüb.

Məsələ ilə bağlı Bakı şəhər Dövlət Yol Polisi İdarəsinin baş inspektoru, polis mayoru Araz Əsgərli Lent.az-a danışıb. O, öz növbəsində tövsiyə edib ki, avtomobil sahibləri nəqliyyat vasitəsini işə salmazdan əvvəl onun ətrafında dövrə vurub diqqət yetirsinlər:

“Əvvəla bildirmək istəyirəm ki, hər bir nəqliyyat vasitəsinin sahibi gündəlik olaraq, avtomobilin texniki sazlığına, onun vəziyyətinə diqqət yetirməlidir. Texniki sazlıqdan başqa, avtomobilin morfoloji əlamətlərinə də diqqət yetirmək lazımdır. Buna görə də, avtomobil sahiblərindən tələb olunur ki, nəqliyyat vasitəsini işə salmamışdan əvvəl onun ətrafında 360 dərəcə dövrə vursun. Bu zaman avtomobilin nömrə nişanının düşdüyünü, onun morfoloji nasazlığını və s. görə bilər. 

Xüsusilə qış mövsümündə avtomobillərini küçədə saxlayanlar bir az da diqqətlərini artırmalıdırlar. Çünki hava soyuq olduğu üçün bəzi küçə heyvanları, xüsusən də pişiklər özlərinə isti yer tapmaq üçün avtomobillərin əsasən mühərrik hissəsində yuva qururlar. Buna görə də tövsiyə olunur ki, sürücü avtomobilə bir siqnal versin, yaxud mühərrikxananı açsın ki, əgər heyvan varsa qaçsın. Əks halda mühərrikin pərinə ilişən heyvan da tələf olur, avtomobilə də ciddi ziyan dəyir”.

# 4560
avatar

Mehman Nəbiyev

Oxşar yazılar