Xəzər sahilində əlillər üçün mərkəz yaradılacaq

“Gələcəkdə Xəzər dənizinin sahilində əlillərin reabilitasiyası üçün daha böyük mərkəz yaradılacaq".

Lent.az-ın məlumatına görə, bunu əmək və əhalinin sosial müdafiəsi naziri Səlim Müslümov bildirib. Nazir vurğulayıb ki, bununla bağlı layihə və təkliflər hazırlanır və yaxın gələcəkdə dövlət başçısına təqdim olunacaq.

”Bu gün Azərbaycanda 8 regional əlillərin bərpa mərkəzi fəaliyyət göstərir. Bununla yanaşı, bütün ölkəyə xidmət edən Bakı Uşaq Reabilitasiya Mərkəzi var. Respublika Əlillərin Bərpa Mərkəzinin hazırda əsaslı təmiri davam edir. Artıq mərkəzin yüksək səviyyədə təmiri başa çatmaq üzrədir. Bərpa mərkəzinə avadanlıqların alınması üçün tender keçiriləcək. Çox güman ki, mərkəz gələn ilin əvvəlləri üçün istismara veriləcək”.

Mərdəkan müalicə pansionatının da əsaslı təmirinə başlanıldığını bildirən nazir qeyd edib ki, orada da eyni şəraitin yaradılması nəzərdə tutulub: “Növbəti ildə Şaqanda müharibə əlilləri və pensiyaçılar üçün 200 nəfərlik pansionatın yenidən qurulması planlaşdırılır. Bu o deməkdir ki, Azərbaycanda əlillərin reabilitasiyası üçün bütün lazımı imkanlar yaradılır. Bu kifayət etmədikdə isə xarici ölkələrin reabilitasiya mərkəzlərindən istifadə edirik . Buna görə dövlət büdcəsindən kifayət qədər vəsait ayrılıb. Əlil vətəndaşlarımız Baltikyanı ölkələrdə əlil uşaqlar, Yunanıstanda isə böyüklər üçün olan müəssisələrə mütəmadi şəkildə müalicəyə göndərilir".