Ünvanlı sosial yardım alanların sayı azalıb

Azərbaycanda ünvanlı dövlət sosial yardımı alan ailələrin sayı 7,1 faiz azalıb. Əmək və Əhalinin Sosial Müdafiəsi Nazirliyindən Lent.az-a verilən məlumata görə, sentyabrın 1-nə olan vəziyyətə əsasən, respublika üzrə ünvanlı dövlət sosial yardımı təyin olunan ailələrin sayı 119 502 ailə təşkil edib ki, bu da ötən ilin müvafiq dövrü ilə müqayisədə 9059 ailə azdır. Ünvanlı sosial yardımların bir ailəyə düşən orta aylıq məbləği isə ötən ilin müvafiq dövrü ilə müqayisədə 14,27 manat, yəni 11,7 faiz artaraq 136,06 manata çatıb. Hazırda ünvanlı dövlət sosial yardımı alan ailələrin 35 504-ü tərkibində 3 və daha çox uşağı olan ailələrdir.

Qeyd edək ki, ötən ilin sonlarından etibarən ünvanlı dövlət sosial yardımlarının təyinatında şəffaflığın və ictimai nəzarətin təmin olunması məqsədilə yardım alan ailələrin, habelə ünvanlı yardım almaq üçün tələb olunan sənədlərin siyahısı ƏƏSMN-nın rəsmi internet saytının (www.mlspp.gov.az) üz səhifəsində yerləşdirilib. Eyni zamanda, ünvanlı yardımların təyinatı prosesinin avtomatlaşdırılması, beləliklə, bu sistemin tam şəffaflaşdırılması istiqamətində ƏƏSMN tərəfindən müvafiq islahat işləri görülür.