UNESCO-da Azərbaycan Tədqiqatı Mərkəzi açıla bilər

Gənclər və idman naziri Azad Rəhimov mayın 26-da Bakıda öz işinə başlayan "Dünya elmində yeni çağırışlar: Gənc alimlərin birgə yanaşmaları" Dünya Gənc Alimlərinin Beynəlxalq Bakı Forumu çərçivəsində ölkəmizə təşrif buyurmuş YUNESKO-nun Baş Konfransının sədri, YUNESKO-nun Çin Milli Komissiyasının direktoru və Çin təhsil nazirinin müavini Hao Pingi qəbul edib. Nazirlikdən Lent.az-a verilən xəbərə görə, görüşdə elm, təhsil, gənclərlə iş sahəsində ikitərəfli və çoxtərəfli əməkdaşlıq perspektivləri, Azərbaycan və dünya gənc alimləri arasında əməkdaşlıq münasibətlərinin qurulması və digər məsələlər müzakirə edilib.

Qonaq Bakının ev sahibliyi etdiyi tədbiri yüksək səviyyədə qiymətləndirərək bu gün dünyada insanların ünsiyyətdə olub, bilik və təcrübələrini paylaşmaları üçün geniş şəkildə yayılmış “People to people” (İnsandan İnsana) layihəsinin Azərbaycan üçün də maraqlı olacağını qeyd edib: “Tam əminliklə qeyd edə bilərəm ki, dünyanın 100-ə yaxın ölkəsindən Azərbaycan da daxil olmaqla 500-ə yaxın gənc magistr, doktorlarını, bir sözlə alimlərini bir araya toplayan tədbir ilk dəfədir ki, bu cür böyük miqyasda keçirilir. Mən Gənclər və İdman Nazirliyinə dəstək və yardım üçün təşəkkürümü bildirirəm. Azərbaycan çox maraqlı, tədqiqatların aparılması üçün diqqət cəlb edən ölkədir. Bu səbəbdən biz YUNESKO-da Azərbaycan Tədqiqatı Mərkəzinin açılmasında maraqlıyıq.”

Gənclər və idman naziri A.Rəhimov öz növbəsində gənclər, elm və təhsil sahələrində nazirliyin həyata keçirdiyi tədbirlər haqda geniş məlumat verib, “Mən Azərbaycan haqda nə bilirəm ” layihəsi çərçivəsində 15-dən artıq ölkədən 250-yə yaxın gəncin Azərbaycana səfər etdiyini bildirib, bu səpkili layihələrin daha da genişlənəcəyini diqqətə çatdırıb.