TQDK yekun qiymətləndirməyə dair təqvim planını təsdiq etdi

Tələbə Qəbulu üzrə Dövlət Komissiyası 2013/2014-cü tədris ilində ümumtəhsil müəssisələri üçün təqvim planını açıqlayıb. Qurumun mətbuat xidmətindən Lent.az-a verilən məlumata görə, TQDK sədri Məleykə Abbaszadə 2013/2014-cü tədris ilində ümumtəhsil müəssisələrinin şagirdləri haqqında məlumatların “Şagird-məzun” sisteminə daxil edilməsi və yekun qiymətləndirmənin aparılması ilə əlaqədar şəhər (rayon) təhsil şöbələri və təhsil müəssisələri tərəfindən yerinə yetiriləcək işlərin təqvim planını təsdiq edib.

Plana əsasən, adları “Şagird-məzun” sistemində olmayan təhsil müəssisələri haqqında məlumatlar bu ilin oktyabrın 17-dən 31-dək TQDK-ya təqdim edilməlidir.

Bundan əlavə, noyabrın 1-dən 30-dək 5-11-ci siniflərdə oxuyan şagirdlərin sayı “Şagird-məzun” sisteminə daxil olunmalı, gələn ilin iyulun 1-dən sentyabrın 1-dək hər bir məzuna verilmiş təhsil haqqında sənədin seriyası, nömrəsinin, verilmə tarixinin, şagirdin təhsil müəssisəsini medalla bitirməsi haqqında məlumatı “Şagird-məzun” sistemində qeyd edilməlidir.

Şagirdlərin fərdi və təhsilə aid məlumatlarının, o cümlədən, buraxılış sinif şagirdlərinin əvvəlki tədris ilinin illik qiymətlərinin təhsil müəssisələrinin əlaqələndiriciləri tərəfindən “Şagird-məzun” sisteminə əlavə edilməsi və məlumatların təsdiq edilməsi (01.12.2013-30.04.2014) də Təqvim Planında öz əksini tapıb.