Şəkidə Gənclər Festivalı keçiriləcək

Mayın 2-də Şəki şəhərindəki “Xan sarayı”nda Gənclər və İdman Nazirliyinin layihəsi olan "Tarixin canlı səhifələri" adlı Gənclər Festivalı keçiriləcək. Nazirliyin mətbuat xidmətindən Lent.az-a verilən məlumata görə, tarixi rekonstruksiya formatında təşkil edilən festivalın əsas məqsədi gəncləri vətənpərvərlik ruhunda tərbiyə etmək, onların tariximizə olan marağını elə özlərinin oynayacağı kiçik səhnəciklər vasitəsilə artırmaq, şərəf dolu tarixi döyüş səhnələrini gənclərə əyani olaraq çatdırmaqdır.

Bütün dünyada geniş yayılan tarixi rekonstruksiya hərəkatı bu günədək Azərbaycanda öz əksini tapmayıb. Məhz bu formatda keçirilən “Tarixin canlı səhifələri” festivalı ölkədə ilk dəfə keçiriləcək.

Festival orta əsrlərdən günümüzə qədər olan tarixi dövrü əhatə edir. Azərbaycanın tarixi qəhrəmanlarından olan Cavanşirin, müstəqilliyimiz uğrunda ərəblərlə mübarizə aparan Babəkin, bütöv Azərbaycanı ilk dəfə vahid halda birləşdirən Şah İsmayıl Xətainin, məşhur Şəki xanı Hacı Çələbinin, Gəncənin müstəqilliyi uğrunda öz canından keçən Cavad xanın həyatı tələbə və aktyorlar tərəfindən canlandırılacaq. Eyni zamanda festival çərçivəsində o dövrə xas olan mədəniyyət, məişət və ənənələr də geniş şəkildə təqdim olunacaq.

Qeyd edək ki, 200 nəfərədək tələbənin qatılacağı festival Azərbaycanın ümummilli lider, müstəqilliyimizin banisi Heydər Əliyevin 91-ci ildönümünə həsr edilir.