Sabah Bakıda yağıntılı hava olacaq

Yanvarın 20-21-də Bakıda və Abşeron yarımadasında hava şəraitinin buludlu, arabir az yağıntılı olacağı gözlənilir. Mülayim şimal şərq küləyi əsəcək. Havanın temperaturu ötən günlərlə müqayisədə tədricən 4-6 dərəcə aşağı enərək günorta saatlarında 5 dərəcəyədək isti müşahidə olunacaq.

Yanvarın 22-də artıq havanın dəyişkən buludlu olacağı, arabir tutulacağı gözlənilir. Mülayim cənub qərb küləyi əsəcək. Havanın temperaturu günorta saatlarında 5-8 dərəcə isti təşkil edəcək.

Proqnozlar bürosunun direktor müavini Gülşad Məmmədova APA TV-yə bildirib ki, bölgələrimizdə də yanvarın 20-21-də havanın bəzi yerlərdə yağıntılı olacağı, dağlıq və dağətəyi rayonlarda qar yağacağı gözlənilir. Mülayim qərb küləyi əsəcək. Havanın temperaturu mərkəzi aran rayonlarında günorta saatlarında 5-10 dərəcə isti, dağlarda isə günorta saatlarında 3 dərəcə şaxtadan 2 dərəcəyədək isti müşahidə olunacaq.

Yanvarın 22-də əksər rayonlarda əsasən yağmursuz hava şəraiti müşahidə olunacaq. Yanvarın 20-21-də Abşeron yarımadasında meteoroloji amillərin zəif və mülayim tərəddüdü meteohəssas insanlar üçün əlverişsiz olacaq.