Ramil Usubov açılış etdi

Bu gün Daxili İşlər Nazirliyi Daxili Qoşunlarının Nərimanov rayonu ərazisində yerləşən "N" saylı hərbi hissəsinin ərazisində zabit və gizirlər üçün yeni tikilmiş yaşayış kompleksinin istifadəyə verilməsinə həsr olunmuş mərasim keçirilib. Bu barədə Lent.az-a Daxili İşlər Nazirliyinin mətbuat xidmətindən məlumat verilib.

Tədbirdə daxili işlər naziri, general-polkovnik Ramil Usubov iştirak edib. Əvvəlcə daxili işlər nazirinin qarşılanması olub, nazir müavini-Daxili Qoşunların komandanı, general-mayor Şahin Məmmədov general-polkovnik R. Usubova şəxsi heyətin mərasimə hazır olması barədə raport verib.

Tədbirdə bildirilib ki, yüksək səviyyədə inşa olunan yeni yaşayış kompleksinin, həmçinin uşaq bağçasının istifadəyə verilməsi prezident İlham Əliyevin Daxili Qoşunlara göstərdiyi böyük diqqət və qayğının bariz nümunəsidir.

Nazir kompleksin rəmzi açılışını bildirən lenti kəsib, buradakı uşaq bağçasında körpələr üçün yaradılmış şəraitlə yaxından tanış olub, eyni zamanda, hərbi qulluqçulara verilən mənzillərə baxıb.