Nəsimi Nəbizadə ilə "Ana xəbər" bloku – 01 İyul

AKP seçim qarşısında idi. Ya partiya və hökumətin gələcəyini riskə ataraq Ərdoğanı prezidentliyə namizəd göstərməli, ya da müxalifətin vahid namizədi qarşısına başqa bir namizədlə çıxmalı idi. AKP riskə getdi və Ərdoğanı prezidentliyə namizəd göstərdi. Risk hakim partiyanın namizədinin seçkilərdə məğlub ola biləcəyi ilə bağlı deyil. Baş naziri indidən prezident seçilməsi münasibətilə təbrik etmək olar. Türkiyədə ölkənin ən xarizmatik lideri olan Ərdoğanı seçkidə məğlub edə biləcək ikinci şəxs yoxdur, bu, günün reallığıdır. AKP-nin üzərinə götürdüyü risk Ərdoğan prezident seçildikdən sonra partiya rəhbərliyinə və hökumətin başına kimi gətirəcəyi ilə bağlıdır. İstər gələcək AKP sədri, istər yeni hökumət başçısı Ərdoğan kimi güclü birisi olmayacaq, bu, aksiomadır. AKP rəhbərliyində liderlik və idarəetmə keyfiyyətlərinə görə baş nazirə bərabər şəxs yoxdur. AKP Ərdoğanı prezidentliyə namizəd göstərməklə ölkənin nominal birinci postunu yen ə özündə saxlamış olacaq, amma partiya və hökumət başçısı postlarını yeniləməklə zəifləyəcək. Bu həm də AKP baxımından ona görə narahatlıq doğurur ki, gələn il Türkiyədə parlament seçkiləridir. Ərdoğan prezident kimi təbliğat kampaniyasında iştirak edə bilməyəcək, Mehmet Əli Şahin, Bülənt Arınc və ya Əhməd Davudoğlunun aparacağı seçki kampaniyasının AKP üçün istənilən nəticə verməyəcəyi şəksizdir. Müxalifətin seçkilərə Ekmələddin İhsanoğlu kimi zəif bir namizədlə qatılması da buna hesablanmış ola bilər. Müxalifət Ərdoğanı prezidentliyə namizəd olmağa şirnikləndirmək üçün seçkilərə zəif namizədlə qatılır və bununla seçkilərdə məğlubiyyəti göz önünə alaraq AKP-nin zəifləməsini təmin etmiş olur. CHP-MHP ittifaqının bu hesablarına qarşı AKP-nin edə biləcəyi ən uğurlu gediş seçkilərdən sonra ölkədə prezident üsul-idarəsinin tətbiqinə yönəlik Konstitusiya islahatları aparmaq ola bilər. Nəzəri baxımdan hakim partiyanın bunu etmək imkanı var, amma zaman kifayət edəcəkmi, bu sualın cavabını vermək çətindir.