Nəsimi Nəbizadə ilə "Ana xəbər" bloku - 5 aprel

NƏSİMİ NƏBİZADƏNİN TƏQDİMATINDA GÜNÜN ŞƏRHİ

Həmin dalğa, həmin koordinat. 24 aprel, Birləşmiş Ştatların qondarma “erməni soyqırımı”nı tanıma dövrü. Ermənilər artıq qondarma “soyqırımın” tanınması haqqında qanun layihəsini ABŞ Konqresinə təqdim ediblər. Həm də bu dəfə birbaşa yuxarı palataya. Gözlənilən addımdır, təəccüb doğuran heç nə yoxdur, təəssüf doğuran isə odur ki, bu il qanun layihəsinin qəbul olunma ehtimalı çoxdur. Səbəb isə... “Twitter”, “Youtube”, korrupsiya qalmaqalı... Nə bilim, o qədər səbəb var ki, saymaqla qurtaran deyil. Düşünməyin ki, Senat Türkiyə sosial şəbəkələrə girişi bağlayıb deyə, “erməni soyqırımı”nı tanıyacaq. Xeyr, sadəcə bu dəfə erməni tərəfin arqumentləri daha güclüdür. Türkiyədə insan haqlarının kobud şəkildə pozulduğunu iddia edən ermənilərin əlinə üstəlik bir “Twitter”, bir “Youtube” bəhanəsi verilib. Həm də bu bəhanə ermənilərin əlinə Türkiyə-ABŞ münasibətlərinin gərgin olduğu dövrdə, həm də Türkiyənin Vaşinqtonda səfirinin olmadığı dövrdə verilib. Qısası, nə qədər ağrılı olsa da, bu il 24 aprel ərəfəsində ABŞ Senatı qondarma soyqırımı tanıyarsa, təəssüflənin, amma təəccüblənməyin.