Nelson Mandela öz kəndində dəfn edildi
15 dekabr 2013 18:18 (UTC +04:00)

Nelson Mandela öz kəndində dəfn edildi

Cənubi Afrika Respublikasının ilk qaradərili prezidenti Nelson Mandela dekabrın 15-də dəfn olunub.  APA -nın “Agence France-Presse” Agentliyinə istinadən verdiyi məlumata görə, Mandela doğulub boya-başa çatdığı, ölkənin cənub şərqində yerləşən Kunu kəndində torpağa tapşırılıb. Dəfn mərasimində Nelson Mandelanın qohumlarının dəvət etdiyi 450 nəfər iştirak edib.  Dəfn mərasimində iştirak edənlər arasında Car-ın hazırkı prezidenti Ceykob Zuma da olub.  Zuma mərasimdə nitq söyləyib. Mandelanın meyiti yaylım atəşi altında torpağa tapşırılıb, onun qəbri kənarında fəxri qarovul düzülüb.  Sabiq prezidentin torpağa tapşırıldığı məzarlığın yaxınlığında isə qapalı dəfn mərasiminə buraxılmayan 4500 nəfər toplaşıb.  Qeyd edək ki, Cənubi Afrika Respublikasının lideri, sabiq prezident Nelson Mandela cari ilin iyun ayında kəskin ağciyər infeksiyası diaqnozu ilə xəstəxanaya yerləşdirilib. Noyabrda Car hökuməti onun səhhətinin stabil kritik vəziyyətdə olduğunu təsdiqləyib. Mandela dekabrın 5-də dünyasını dəyişib. 10 gün ərzində ölkədə onunla vida mərasimləri keçirilib. Bəzi məlumatlara görə, onunla vida mərasimlərinə on minlərlə insan qatılıb. Nelson Mandela ilə vida mərasimində müxtəlif ölkələrin liderləri, o cümlədən ABŞ prezidenti Barak Obama da iştirak edib. Mandela Car tarixində ilk qaradərili prezident olub. O, 1994-cü ilin may ayından 1999-cu ilin iyununadək ölkəni idarə edib. Aparteid rejiminə qarşı fəal mübarizə apardığına görə ömrünün 27 ilini həbsxanada keçirib. 1993-cü ildə Mandela Nobel sülh mükafatına layiq görülüb.

 
# 1262
avatar

Oxşar yazılar