Müəllimlərin imtahanı başlayır

İyulun 25-dən ümumi təhsil və ilk peşə-ixtisas təhsili müəssisələrindəki 3286 vakant yerə müəllimlərin işə qəbulu ilə bağlı imtahanlar başlayır.

Lent.az-ın verdiyi məlumata görə, müəllimlər qrup şəklində avqustun 7-nə qədər imtahan verəcəklər.

Qeyd edək ki, təhsil nazirinin “2013-2014-cü tədris ilində ümumi təhsil və ilk peşə-ixtisas təhsili müəssisələrinə müəllimlərin işə qəbulunun tənzimlənməsi barədə” əmrinə uyğun olaraq, iyulun 1-dən elektron ərizələrin qəbuluna başlanılıb. İyulun 15-də müəllimlərin işə qəbulu üzrə elektron ərizələrin qəbulu prosesi başa çatıb.

Müəllimlərin işə qəbulu üzrə ümumi təhsil və ilk peşə-ixtisas təhsili müəssisələrindəki 3286 vakant yerə 18782 nəfər ərizə verib. 15 gün ərzində ölkənin ümumi təhsil və ilk peşə-ixtisas təhsili müəssisələrindəki 3286 vakant yerə 18782 nəfərin ərizəsi qəbul olunub. İşə qəbul üzrə qeydiyyatdan keçmiş ərizələrin təsdiqlənməsi prosesi 16-20 iyul tarixində həyata keçirilib. 21-23 iyul tarixlərində imtahan qrupları formalaşdırılıb.

Test imtahanları Azərbaycan Dövlət İqtisad Universitetinin əsas korpusunda keçiriləcək. Bu mərhələni başa vuranlar üçün 12-16 avqust tarixlərində müsahibə təşkil olunacaq.