Məleykə Abbaszadə: “Rektorlar bizdən küsməsin”

Ali məktəblərin reytinq siyahısı açıqlandı

Tələbə Qəbulu üzrə Dövlət Komissiyasının (TQDK) sədri Məleykə Abbaszadə ali məktəblərin reytinq siyahısını açıqlayıb. Lent.az-ın məlumatına görə, M. Abbaszadə qeyd edib ki, ötən il qəbul imtahanlarında yüksək nəticə göstərən gənclərin 385 nəfəri Azərbaycan Tibb Universitetinə, 261 nəfəri Bakı Dövlət Universitetinə, 197 nəfəri Qafqaz Universitetinə, 191 nəfəri Azərbaycan Respublikası Prezidenti yanında Dövlət İdarəçilik Akademiyasına, 121 nəfəri Bakı Ali Neft Məktəbinə, 121 nəfəri Azərbaycan Dillər Universitetinə, 70 nəfəri Azərbaycan Diplomatik Akademiyasına, 60 nəfəri İnformasiya Texnologiyaları Universitetinə, 50 nəfəri Azərbaycan Dövlət İqtisad Universitetinə, 47 nəfəri Azərbaycan Dövlət Neft Akademiyasına və s. daxil olub.

Komissiya sədrinin sözlərinə görə, bu il respublikanın ali təhsil müəssisələrinə keçirilən qəbul imtahanlarında 96 min 720 abituriyent iştirak edib. “Onlardan 42,98 %-i 0-100, 21,99 %-i 100-200, 13,84 %-i 200-300, 15,65 %-i 300-500, 5,55 %-i isə 500-700 bal toplayıb. Abituriyentlərdən 1617 nəfəri 600 baldan yuxarı nəticə göstərib.

Yüksək ballılar respublikanın, demək olar, bütün şəhər və rayonlarını, o cümlədən bəzi kənd məktəblərini təmsil edirlər. Yüksək nəticə göstərənlər I qrupda 371, II qrupda 301, III qrupda 542, IV qrupda 403 nəfərdir. 6 nəfər isə maksimal nəticə (700 bal) əldə edib. Onlardan 4-ü III qrupun və 2-si IV qrupun abituriyentləridir.

M. Abbaszadə bildirib ki, bu il ali təhsil müəssisələrinin reytinq cədvəlinə Bakı Ali Neft Məktəbi başçılıq edir. “İnformasiya Texnologiyaları Universiteti reytinq göstəricilərinə görə 2-ci yerdədir. Prezident yanında Dövlət İdarəçilik Akademiyası isə reytinq göstəricilərinə görə 3-cü yerdədir. Bakı Ali Neft Məktəbi və Azərbaycan Dövlət Neft Akademiyası istisna olmaqla, qalan texniki ali təhsil müəssisələri reytinq cədvəlində nisbətən aşağı mövqelərdə yerləşiblər. Respublikanın regionlarını təmsil edən ali təhsil müəssisələri sırasında Naxçıvan Dövlət Universiteti ən yüksək reytinqə malikdir. Reytinq göstəricisinə (2973) görə bu universitet respublikanın ali təhsil müəssisələri içərisində 9-cu mövqedə yerləşir. Ən zəif reytinqə malik olan dövlət ali təhsil müəssisəsi Azərbaycan Texnologiya Universitetidir. Özəl ali təhsil müəssisələri arasında ən yüksək reytinqə Qafqaz Universiteti malikdir. Xahiş edirəm ki, rektorlar bizdən küsməsin”.