Fərdi uçot sistemində 2 milyon 800 min sığortaolunan qeydiyyatdadir

“Cari ilin əvvəli ilə müqayisədə fərdi uçot sistemində qeydiyyatda olan sığortaolunanların sayı 4.1 faiz artıb”. DSMF-nın İctimaiyyətlə əlaqələr sektorundan lent.az-a verilən məlumata görə, bu barədə DSMF sədri Elman Mehdiyev bildirib. Onun sözlərinə görə, 2014-cü ilin 5 ayı ərzində 110 minə yaxın sığortaolunan əlavə qeydiyyata alınıb və bu, ölkəmizdəki iqtisadi inkişafın daimi yeni iş yerlərinin açılmasına və qeydiyyatda olan sığortaolunanların sayının artımına birbaşa təsirinin göstəricisidir. E. Mehdiyev həmçinin bildirib ki, hazırda Azərbaycanda 2 milyon 800 mindən artıq sığortaolunana fərdi uçot sistemində fərdi şəxsi hesab açılıb. DSMF-nın fərdi uçot sistemində qeydiyyatda olan hər bir sığortaolunan özü üçün sosial sığorta haqlarının vaxtında və tam məbləğdə köçürülməsinə nəzarət etmək imkanına malikdir. İstənilən sığortaolunan “Sığortaolunanlara məlumatların verilməsi” adlı elektron xidməti vasitəsilə onun üçün işəgötürən tərəfindən hər ay üzrə ödənilən məcburi dövlət sosial sığortası barədə məlumatları maneəsiz əldə edə və illər üzrə öz pensiya kapitalını izləyə bilər. Cari ilin iyunun 1-nə olan məlumata əsasən, DSMF-nın fərdi uçot sistemində qeydiyyatda olan sığortaolunanların 58.8 faizi kişi, 41.2 faizi isə qadındır. Fərdi uçot sistemində qeydiyyatda olan sığortaolunanların 22.9 faizini 30 yaşa kimi, 24 faizini 30-40 yaş aralığında olan, 21.8 faizini 40-50 yaş aralığında olan, 20.9 faizini 50-60 yaş aralığında olan, 10.4 faizini 60 yaşdan yuxarı vətəndaşlar təşkil edir.