Elmar Qasımov Avstriya və Sloveniyada səfərdə olub

Bakı Ali Neft Məktəbinin (BANM) rektoru Elmar Qasımovun rəhbərlik etdiyi nümayəndə heyəti Avstriya və Sloveniyada səfərdə olublar. Bu barədə Lent.az-a ali məktəbdən məlumat verilib.

Səfər çərçivəsində Avstriya Parlamentinin (Milli Şura) Elm komitəsinin sədri Andreas Karlsbök ilə görüş keçirilib. Görüşdə iki ölkə arasında elm və təhsil sahəsində əməkdaşlıq sahəsində artıq bir sıra mühüm addımların atıldığı bildirilib.

ARDNŞ-nin nümayəndə heyətinin Leoben Montana Universitetində universitetin rəhbərliyi, o cümlədən universitetin Ali Elm Şurasının üzvləri ilə görüşü də olub. Öncə universitetin rektoru Vilfrid Ayxlseder qonaqları salamlayıb və ali təhsil ocaqları arasında səmərəli əməkdaşlıq qurulacağına ümidvar olduğunu bildirib.

ARDNŞ-nin Avstriyadakı nümayəndəliyinin Leoben Universiteti ilə il yarımdan artıq müddət ərzində apardığı yazışma və danışıqlar, habelə birbaşa BANM ilə universitet arasında danışıqların çox yüksək səviyyədə aparılması nəticəsində hər iki təhsil ocağı arasında Anlaşma Memorandumu imzalanıb.