Deputat: “Bəzi insanlar məndən şübhələnirdi”

Milli Məclisin deputatı Adil Əliyev nəqliyyat naziri Ziya Məmmədovun qardaşı, millət vəkili Elton Məmmədovun oğlunun videolarının yayılmasında rolunun olması barədə xəbərlərə münasibət bildirib. Lent.az-ın məlumatına görə, A.Əliyev öz facebook səhifəsində bəyan edib ki, onun heç bir saytı və ya qəzeti yoxdur: “Dəyərli dostlar, bu gün “Azadlıq” qəzetinin yaydığı bir məlumat bu statusu yazmağa məni vadar etdi. Guya həmkarım Elton Məmmədovun oğlunun videogörüntülərinin yayılmasında həmkarım məndən şübhələnir. Əvvəllər də bu kimi məsələlərdə bəzi tanıdığım insanlar məndən şübhələnirdilər, hesab edirdilər ki, əgər bezi saytlar onlar barəsində nə isə yazıblarsa, deməli günahkar Adil Əliyevdir. Əvvəla, bəyan edirəm ki, mənim jurnalist dostlarım çoxdur və bunu normal hesab edirəm. Və bəyan edirəm ki, mənim heç bir saytım və qəzetim yoxdur. O ki qaldı hər hansı bir məlumatın ötürülməsinə, bir dəfə demişdim, yenə də deyirəm. Əgər mənim sözüm varsa, mən sözü kişi kimi adamın üzünə deyirəm, dalınca danışmıram. Məlumat ötürmək bizlik deyil”.