Dənizkənarı bulvarda müasir attraksion-panoramın açılışı olub - YENİLƏNİB

Martın 10-da Dənizkənarı Milli Parkın Dövlət Bayrağı Meydanına qədər uzanmış yeni bulvar hissəsində müasir attraksion-panoramın açılışı olub. Lent.az-ın məlumatına görə, açılışda prezident İlham Əliyev və xanımı Mehriban Əliyeva iştirak edib.

Onlara yeni qurğunun texniki göstəriciləri və xidməti imkanları barədə məlumat verilib.
Qeyd edilib ki, diametri 60 metr olan yeni qurğuda hərəsində 8 nəfərlik yer olmaqla 30 kabinə var. Dövlət başçısı və xanımı yeni qurğu ilə yaxından tanış olublar. Yeni attraksion-panoram yaxın günlərdə paytaxt sakinlərinin və qonaqların istifadəsinə veriləcək.

Qeyd edək ki, Dənizkənarı Milli Parkın Dövlət Bayrağı Meydanına qədər uzadılması layihəsi prezident İlham Əliyevin tapşırığı ilə icra olunub. Müasir attraksion-panoramın tikinti və quraşdırma işlərinə Hollandiyanın Dutch Wheels (Daç Vilz) şirkəti ilə bağlanmış müqaviləyə əsasən, 2013-cü ilin sentyabrında başlanılıb.