Daxili Qoşunların internet səhifəsi yaradılıb

Daxili İşlər Nazirliyinin Daxili Qoşunlarının (DQ) rəsmi internet səhifəsi (dq.mia.gov.az) yaradılıb. DQ-nın mətbuat xidmətindən Lent.az-a verilən xəbərə görə, internet səhifəsinin yaradılmasında əsas məqsəd DQ-nın ictimaiyyətlə əlaqələrinin səmərəliliyinin artırılması, qoşunların həyatında baş vermiş yeniliklər barədə cəmiyyətin mütəmadi olaraq daha dolğun məlumatlandırılmasından ibarətdir.

Səhifə müvafiq sahələr üzrə kataloqlar, faydalı informasiya resursları və linklərlə təmin olunub.

Saytda ümummilli lider Heydər Əliyev, prezident, Silahlı Qüvvələrin Ali Baş Komandanı İlham Əliyevin həyat və fəaliyyətini əks etdirən materiallarla yanaşı, DQ-nın tarixi, döyüş yolu, xidməti-döyüş fəaliyyətinin müxtəlif istiqamətləri geniş işıqlandırılıb.

İnternet səhifəsində DQ-nın Ali Hərbi Məktəbi, Hərbi hospitalı, Nümunəvi-göstərici hərbi orkestri və muzeyi haqqında geniş məlumatlar verilib, o cümlədən qoşunların mətbu orqanı olan "Əsgər" qəzetinin elektron variantı və fotoalbom yerləşdirilib.

Səhifənin istifadəçiləri müvafiq hərbi qanunvericilik bazasından faydalana biləcəklər.

Vətəndaşların sayt vasitəsilə DQ-nın Baş İdarəsinə onlayn müraciət etmək imkanları da olacaq.