Azərbaycanlı ziyalılar III Dünya Türk Forumunda

İstanbulda Türk-Asiya Strateji Araşdırmalar Mərkəzinin (TASAM) təşkilatçılığı ilə keçirilən III Dünya Türk Forumunun Ədirnənin Trakya Universitetində açılışı mərasimi keçirilib. Lent.az-ın xəbərinə görə, forumda Azərbaycandan millət vəkilləri Qənirə Paşayeva, Musa Qasımlı, Fərəc Quliyev, Diasporla İş üzrə Dövlət Komitəsinin sədr müavini Valeh Hacıyev, “Olaylar” agentliyi rəhbəri Yunus Oğuz, “Xalq Cəbhəsi” qəzetinin rəhbəri Elçin Mirzəbəyli və başqaları iştirak edib.

III Dünya Türk Forumunun açılış mərasimində bütün iştirakçılarını salamlayan TASAM başkanı Süleyman Şensoy 3-cü dəfə keçirilən Dünya Türk Forumunun əhəmiyyətini vurğulayıb.

Azərbaycan nümayəndə heyəti adından çıxış edən millət vəkili Q.Paşayeva nitqinə Manisanın Soma mədənində baş vermiş faciə ilə əlaqədar Türk xalqına başsağlığını çatdırıb. III Dünya Türk Forumunun açılışı mərasiminin Azərbaycan üçün çox əlamətdar bir gündə - müsəlman Şərqində ilk parlamentli respublika olan Azərbaycan Demokratik Respublikasının qurulmasının 96-cı ildönümü günündə keçirildiyini vurğulayan Q.Paşayeva bu günün Türkiyədə Türk dünyasından gəlmiş qardaş-bacılarımızla birgə qeyd etməyin xüsusi önəmini ifadə edib.

Ədirnə valisi Hasan Duruer, TASAM-ın rəhbəri Süleyman Şensoy, Türk dünyasının hər yerindən gələn qonaqlar Azərbaycan nümayəndə heyətini təbrik ediblər.