Ali məktəblər dərsliklərin hazırlanmasında iştirak edəcək

“Ali məktəblər dərsliklərin hazırlanmasında iştirak edəcəklər”. Lent.az-ın məlumatına görə, bunu təhsil naziri Mikayıl Cabbarov deyib. Onun sözlərinə görə, bununla bağlı rektorlarla görüşlərdə müzakirə aparılıb: “Düşünürük ki, bu, həmin təhsil müəssisələrinin marağında olan məsələdir”.

Nazirin sözlərinə görə, dərsliklərin hazırlanmasında iştirak etməklə ali məktəblərin müəllimləri, orada çalışan peşəkarlar əlavə gəlir mənbəyi əldə etmiş olacaqlar.

M. Cabbarov vurğulayıb ki, ali təhsil ocaqlarında olan elmi mütəxəssislərin dərslik hazırlama prosesinə cəlb olunması qarşıda duran əsas məsələlərdən biridir.

“Dərslik müəlliflərinin siyahısına baxdıqda görürük ki, yüksək bilik və bacarığa malik olan ali təhsil ocaqları dərsliklərin hazırlanması prosesində fəal iştirak etmirlər. Bu sual ali təhsil ocaqlarına ünvanlanmalıdır. Bu prosesin təşkilində bizim tərəfimizdən müvafiq dəyişikliklər tətbiq olunacaq”.