ADİU-da “Məzun – 2014” yarmarkası keçirilib

Mayın 23-də Gənclər və İdman, Təhsil, İqtisadiyyat və Sənaye nazirliklərinin dəstəyi ilə Azərbaycan Dövlət İqtisad Universitetində IX “Məzun-2014” ümumrespublika yarmarkası keçirilib. ADİU-dan Lent.az-a verilən məlumata görə, “Sənaye ili” çərçivəsində təşkil olunan yarmarkada 100-dən çox dövlət qurumu, sənaye müəssisələri, şirkət və bank iştirak edib.

Təhsil naziri Mikayıl Cabbarov, iqtisadiyyat və sənaye nazirinin müavini Niyazi Səfərov, gənclər və idman nazirinin müavini İntiqam Babayev və ADİU-nun rektoru Ədalət Muradov yarmarkaya baxış keçiriblər. Dövlət və özəl qurumların nümayəndələri, işəgötürənlər Təhsil Naziri Mikayıl Cabbarova vakant iş yerləri haqda məlumat veriblər. Nazir işaxtaranların peşə seçimi ilə maraqlanıb və onlara düzgün seçim etmələrini tövsiyə edib.

“Məzun-2014” yarmarkasında rekord göstərici qeydə alınıb. Belə ki, tədbirdə 2500-ə qədər məzun iştirak edib. Eyni zamanda 12 ölkənin (ABŞ, Türkiyə, Rusiya, Kanada, Böyük Britaniya, Almaniya, Avstriya, Estoniya, Litva, Bolqarıstan, Ukrayna, Gürcüstan) 67 universitetinin məzunu da yarmarkaya qatılıb.

“Məzun-2014” yarmarkasında gənclərə 1000-ə yaxın vakant iş yeri təklif olunub. Bu da indiyə kimi qeydə alınmamış nəticədir. Yarmarkada məzunların dövlət və biznes strukturlarının nümayəndələri ilə görüşləri təşkil edilərək, ən qabiliyyətli və perspektivli məzunlar daimi və müvəqqəti iş yerləri ilə təmin ediləcəklər.

Yarmarka çərçivəsində işəgötürənlər məzunlara müxtəlif ixtisaslar üzrə vakant iş yerləri, staj keçmə, təqaüd və təcrübə proqramları da təqdim ediblər.

Tədbir çərçivəsində Bakının Səbail rayonunun 132-134 saylı təhsil kompleksinin XI sinif şagirdlərinin yarmarka ilə tanışlığı da təşkil olunub. Məqsəd şagirdlərin gələcək seçimlərində iqtisad yönümlü ixtisaslara maraqlarını artırmaqdır.

Həmçinin ADİU-nun Tələbə Gənclər Təşkilatı ilə “Damla” Aztəminatlı Ailələrə Qayğı İctimai Birliyi birgə yarmarkada valideyn himayəsindən məhrum olmuş, xüsusi diqqət və qayğıya ehtiyacı olan yeniyetmələrin hazırladığı rəsm və tətbiqi sənət işlərindən ibarət satış-sərgisi də keçirilib. Sərgidə satılan əl işlərindən yığılan vəsait ehtiyacı olan şəxslərə veriləcək. Məqsəd xüsusi diqqət və qayğıya ehtiyacı olan uşaqların cəmiyyətə inteqrasiyası, onların yaradıcılıq potensialının üzə çıxarılmasıdır.

Bundan başqa, gün ərzində tələbə və məzunlar üçün özəl şirkətlər tərəfindən müxtəlif uduşlu lotereyalar, hədiyyə kampaniyaları, müsabiqələr, mükafatlandırmalar və digər həvəsləndirmə tədbirləri həyata keçirilib.

Yarmarka bitdikdən sonra müraciət edən bütün məzunların CV-ləri dövlət qurumlarına və özəl şirkətlərə təqdim edilib.