FHN Lənkəranda gənc xilasedici və yanğınsöndürənlərin rayon birinciliyini keçirib
15 aprel 2014 00:02 (UTC +04:00)

FHN Lənkəranda gənc xilasedici və yanğınsöndürənlərin rayon birinciliyini keçirib

Fövqəladə Hallar Nazirliyinin (FHN) Cənub Regional Mərkəzində ümummilli lider Heydər Əliyevin anadan olmasının 91 illiyinə həsr olunmuş gənc xilasedici və yanğınsöndürənlərin rayon birinciliyi keçirilib.

 

APA-nın cənub bürosunun məlumatına görə, yarışda Lənkəran şəhər 1, 3, 4, 5, 6, 7, 9, 10 №-li tam orta məktəblərinin və  Xarici dillər təmayüllü gimnaziyanın komandaları güclərini sınayıblar.

 

Lənkəran Şəhər İcra Hakimiyyətinin, rayon Təhsil Şöbəsinin, Gənclər və İdman İdarəsinin, FHN-nin regionda fəaliyyət göstərən qurumlarının nümayəndələrinin qatıldıqları tədbirin açılış mərasimində çıxış edən FHN-nin Cənub Regional Mərkəzinin rəisi polkovnik Zəmani Dadaşov FHN-nin təşkilatçılığı və Təhsil, Gənclər və İdman nazirliklərinin birgə dəstəyi ilə keçirilən yarışların əhəmiyyətindən, yeniyetmə və gənclərin fövqəladə hallara hazırlıq səviyyəsinin yüksəldilməsindən, məktəblilər arasında şəxsi və ictimai təhlükəsizliyə məsuliyyətli yanaşma hissinin artırılmasından, gənc nəslə hərbi-vətənpərvərlik ruhunun aşılanmasndan, gənclər arasında sağlam həyat tərzinin təbliğinin, məktəblilərin yanğın və texniki təhlükəsizlik qaydalarına ciddi əməl etmələrinin, ilkin tibbi yardımın düzgün göstərilməsi qaydalarının mənimsənilməsinin vacibliyindən geniş bəhs etməklə komandalara uğurlar arzulayıb.

Yarış kombinə edilmiş yanğın estafeti, maneələr zolağı, komandaların təqdimatı və gənc ekspertlər müsabiqəsi adlı mərhələlərdən ibarət olub.

 

Gərgin mübarizə şəraitində keçən yarışın yekunlarına görə, R.Bədəlov adına Lənkəran şəhər 9 №-li tam orta məktəbi birinci,  Lənkəran şəhər 5 №-li tam orta məktəbi ikinci və Lənkəran şəhər xarici dillər təmayüllü gimnaziya üçüncü yeri tutub.

 

Yarışda fərqlənmiş komandalar təşkilat komitəsinin diplom və qiymətli hədiyyələri ilə təltif olunublar. Birinci yeri tutan komanda isə ümummilli lider Heydər Əliyevin anadan olmasının 91 illiyi münasibətilə keçiriləcək gənc xilasedici və yanğınsöndürənlərin  zona yarışlarında iştirak etmək hüququ qazanıb.

# 929
avatar

Oxşar yazılar