“Soyqırımın izi ilə” – APA TV-nin çəkiliş qrupu İğdır və Qarsda!

APA TV-nin çəkiliş qrupu 24 aprel - qondarma “erməni soyqırımı”nın ildönümü ərəfəsində Türkiyənin Qars, İğdır və Ağrı vilayətlərində olub. Səfərdə məqsəd ötən əsrin əvvəllərində bu bölgədə türklərə qarşı törədilmiş soyqırımına dair faktlar əldə etmək, bu faktlar əsasında “Soyqırımın izi ilə” adlı silsilə sənədli filmlər çəkməkdir. Çəkiliş qrupu türk soyqırımının canlı şahidlərinin ifadələrini lentə alıb, soyqırımın törədildiyi ərazilərdə olub, İğdır (Hakmehmet, Oba, Daşburun kəndləri) və Qarsdakı (Subatan) kütləvi məzarlıqlardan unikal süjetlər hazırlayıb, bu məzarlıqlar başında açıq səma altında proqramlar çəkib. Bundan başqa qondarma bölgənin tanınmış ictimai-siyasi xadimlərindən, qeyri-hökumət təşkilatlarının rəhbərlərindən “erməni soyqırımı”nın gerçək üzünə dair müsahibələr götürülüb. APA TV-nin çəkiliş qrupu həmçinin İğdır və Qarsda seçkilərdən sonrakı duruma, bölgənin unikal tarixi abidələrinə həsr olunmuş reportaj və sənədli xronika hazırlayıb. Önümüzdəki aylardan başlayaraq yayımlanmağa başlayacaq “Sərhəd hekayələri” silsiləsinin ilk iki seriyası da Qarsın Ermənistanla sərhəd Halıkışla kəndində və tarixdə “qaçaqaç dövrü” adlanan dövrdə Ermənistandan kütləvi şəkildə Türkiyəyə köç etmiş insanların yaşadığı Daşburun kəndi (İğdır) və Akyaka qəsəbəsində (Qars) çəkilib. Hər kəsin “Axırıncı aşırım” filmindən tanıdığımız Kərbəlayı İsmayılın dünyaya göz yumduğu kənddən hazırlanan sənədli film, Kərbəlayı İsmayılın qardaşı oğlu Məhərrəm Çimənin əmisi haqqında xatirələri yəqin ki tamaşaçıların marağına səbəb olacaq. Bundan başqa Qarsın yeni seçilmiş azərbaycanlı bələdiyyə başqanı Mürtəza Qaraçanta, Qars valisi Eyüp Tepedən müsahibə alınıb, Qarsın tanınmış azərbaycanlı ziyalılarından Çətin Adıgüzəl, Göksəl Qayğısız və Vedat Akçayöz APA TV-də yayımlanan “Panoram” və “Manşet” proqramının qonağı olublar. Qars qalasının tarixinə, Qarsda xristian türklərdən qalmış tarixi abidələrə, unikal memarlıq nümunələrinə həsr olunmuş reportajların da marağa səbəb olacağını düşünürük. İğdırın keçmiş bələdiyyə başqanı Nurəddin Aras, “Güvən” qəzetinin sahibi, jurnalist İsmail Aras, Əsassız Erməni Soyqırımı İddialarına Qarşı Mübarizə Dərnəyinin sədri Göksəl Gülbəy, İğdır Ticarət və Sənaye Palatasının rəhbəri Kamil Arslanla müsahibələrin tamaşaçılarımızda Türkiyənin azərbaycanlılar yaşayan bu bölgəsində gerçək durumla tanış olmaq fürsəti yaradacağı qənaətindəyik. APA TV-ni izləməyi unutmayın.