“ASAN xidmət” Çağrı Mərkəzi 1 yaşını qeyd edir

Bu gün Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “Çağrı” mərkəzi şöbəsinin fəaliyyətinin 1 ili tamam olur. Lent.az-ın məlumatına görə, dövlət Agentliyinin “Çağrı” mərkəzi, “ASAN xidmət” mərkəzlərində dövlət orqanlarının göstərdiyi bütün xidmətlərin göstərilməsini təmin edir. “Çağrı” mərkəzi vasitəsilə vətəndaşlar “ASAN xidmət” mərkəzlərinə gəlmədən onlayn müraciət, email, internet və ya telefon vasitəsilə mövcud dövlət orqanlarının göstərdiyi bütün xidmət növləri, tələb edilən sənədlər, dövlət rüsumu və ya xidmət haqqı barədə məlumat ala, növbə tuta, mərkəzin fəaliyyəti ilə bağlı təklif və şikayətlərini bildirə bilərlər. Eyni zamanda mərkəzlərdə yerləşdirilmiş xüsusi elektron şikayət köşkü vasitəsi ilə vətəndaşlar “Çağrı” mərkəzi əməkdaşları ilə canlı video əlaqə yaradaraq “ASAN xidmət” mərkəzlərinin fəaliyyəti ilə bağlı öz təklif və şikayətlərini bildirə bilərlər.

Onu da əlavə edək ki, ötən bir il ərzində “Çağrı” mərkəzi tərəfindən “108” telefon nömrəsi vasitəsi ilə 155.476, onlayn əlaqə ilə 10.670, rəsmi elektron poçt ünvanından 401, sosial şəbəkələr vasitəsi ilə 26 mindən artıq olmaqla ümumilikdə 200.000-ə yaxın müraciət cavablandırılmışdır.