"Elektron xidmət növlərinin Siyahısı"na əlavələr edildi

Baş nazir Artur Rasizadə “Mərkəzi icra hakimiyyəti orqanları tərəfindən konkret sahələr üzrə elektron xidmətlər göstərilməsi Qaydaları"nın və "Elektron xidmət növlərinin Siyahısı"nın təsdiq edilməsi haqqında" Nazirlər Kabinetinin qərarında dəyişikliklər edilməsi barədə qərar verib. Bu barədə Lent.az-a Nazirlər Kabinetindən məlumat verilib. Qərar Əmlak Məsələləri Dövlət Komitəsinin Ədliyyə Nazirliyi, Rabitə və Yüksək Texnologiyalar Nazirliyi və Prezident yanında Vətəndaşlara Xidmət və Sosial İnnovasiyalar üzrə Dövlət Agentliyi ilə razılaşdırılmış təklifini nəzərə alaraq verilib. Qərarla "Elektron xidmət növlərinin Siyahısı"nda əlavələr edilib.

Qərara əsasən, dövlət əmlakının icarəyə verilməsi müqavilələri üzrə icra haqqında məlumatların verilməsi, məhv olmuş daşınmaz əmlakın və onun üzərindəki hüquqların qeydiyyatının ləğvi, daşınmaz əmlakla bağlı uzufruktun dövlət qeydiyyatının ləğvi və sənədlərin qəbulu, daşınmaz əmlak obyekti barədə daşınmaz əmlakın reyestri haqqında məlumatların verilməsi elektron qaydada mümkün olacaq.