Oqtay Əsədov: “...Azərbaycanın ərazi bütövlüyü həmişə dəstəklənib”

Milli Məclisin sədri Oqtay Əsədov NATO Parlament Assambleyasının nümayəndə heyətini qəbul edib. Bu barədə Lent.az-a Milli Məclisin mətbuat xidmətindən məlumat verilib.
Spiker NATO PA-nın sədri H. Beyli ilə söhbətində Azərbaycanın bu nüfuzlu beynəlxalq qurumla əlaqələrin inkişafına böyük önəm verdiyini vurğulayıb. Bu cür görüşlərin ikitərəfli əməkdaşlığın daha da möhkəmlənməsinə xidmət etdiyini deyib: “Əvvəllər təşkilatda müşahidəçi statusunda iştirak edən Azərbaycan bu gün NATO Parlament Assambleyasının assosiativ üzvüdür. Təşkilatda Azərbaycan nümayəndə heyətinə Milli Məclis sədrinin birinci müavininin rəhbərlik etməsi bizim bu qurumla əlaqələrə böyük əhəmiyyət verməyimizin göstəricisidir”.
O. Əsədov onu da vurğulayıb ki, Milli Məclisin nümayəndə heyəti NATO PA-nın keçirdiyi tədbirlərdə fəal iştirak edir: “Təqdirəlayiq haldır ki, NATO-nun sammitlərində qəbul olunmuş bəyannamələrdə Azərbaycanın ərazi bütövlüyü həmişə dəstəklənib. Biz gələcəkdə bu təşkilatla əməkdaşlığımızı davam etdirmək niyyətindəyik. Qurumun 2014-cü ilin iyununda keçiriləcək Rouz-Rout seminarına Bakının ev sahibliyi etməsi barədə qərar isə bizim tərəfimizdən məmnunluqla qarşılanıb”.

Söhbətdə tərəfləri maraqlandıran məsələlər ətrafında geniş fikir mübadiləsi aparılıb.