“Səkinə nənə əmin əllərdədir”.
Lent.az məlumat verir ki, bu barədə Sosial Xidmətlər Agentliyinin ictimaiyyətlə əlaqələr şöbəsinin müdiri Murad Həşimov məlumat verib. O bildirib ki, Səkinə Həsənova artıq Sosial Xidmətlər Agentliyinin müəssisələrindən birisinin sakinidir.
M.Həşimov onun müəssisədən olan şəkillərini də paylaşıb.
Xatırladaq ki, 87 yaşlı Səkinə Həsənovanın tövlədə əl-qolu bağlanılaraq ac-susuz saxlanılması və ona işgəncə verilməsi barədə video yayılmışdı.
Əlavə edək ki, S.Həsənovanın bağlanılması və zaman-zaman döyülməsi ilə bağlı Gədəbəy rayon Polis Şöbəsində cinayət işi başlanılaraq istintaq-əməliyyat tədbirləri həyata keçirilib. Keçirilən tədbirlər nəticəsində Səkinə Həsənovanı tövləyə bağlamaqda şübhəli bilinən qohumu 1947-ci il təvəllüdlü Qəzənfər Hacıyev barəsində Cinayət Məcəlləsinin 145-ci (Qanunsuz azadlıqdan məhrum etmə) maddəsi ilə cinayət işi başlanılaraq rayon prokurorluğuna göndərilib.
Faktla bağlı Gədəbəy rayon Prokurorluğunda araşdırmalar davam etdirilir.