Bakıda qardan sonra təmizlik işləri başladı

Paytaxta yağan qardan sonra operativ təmizlik tədbirləri aparılır.

Bakı Şəhər İcra Hakimiyyətindən Lent.az-a verilən məlumata görə, yanvarın 20-dən başlayaraq Bakı şəhərinə ilk qar yağmış, ötən keçən gecə isə paytaxtın bəzi yerlərində qar örtüyü yaranıb. Bununla əlaqədar Bakı Şəhər İcra Hakimiyyətinin kommunal xidmətləri tərəfindən Bakı şəhərində payız-qış mövsümünə hazırlıq tədbirləri planına uyğun operativ tədbirlər həyata keçirilib. Rayonlar üzrə cavabdeh şəxslər, operativ qərargah üzvləri ərazilər üzrə mövcud vəziyyəti yerində öyrənərək müvafiq qabaqlayıcı tədbirlərin görülməsini təmin ediblər. Qar yağmış ərazilərdəki prospekt, küçə və yollar gecə saatlarında burada növbədə olan xüsusi təyinatlı texnika və kommunal xidmət əməkdaşları tərəfindən təmizlənmiş, bəzi yerlərə duz səpilmiş, yollarda avtonəqliyyat vasitələrinin hərəkətinə mane ola bilən hal olmayıb.

Səhər saatlarından etibarən paytaxtın kommunal xidmətləri tərəfindən yağan qarın nəticələrinin aradan qaldırılması və operativ təmizlik işlərinin həyata keçirilməsinə başlanıb. Kommunal xidmətlərin avtonəqliyyat vasitələri və əməkdaşları tərəfindən prospekt və küçələrin kənarlarının çirklənmədən təmizlənməsinə, səki kənarları, bordyurların və buradakı işıq dirəklərinin yuyulmasına, yol kənarlarına yığılan çirkabların təmizlənməsinə başlanıb.

Eyni zamanda Bakı Şəhər Yaşıllaşdırma Təsərrüfatı Trestinin əməkdaşları yol kənarlarındakı yaşıllıq zolaqlarını yuyaraq təmizlənib, sınmış ağaclar budanıb, digər lazımı işlər həyata keçirilib.

Təmizlik işləri paytaxtın bütün rayonlarında aparılır və şəhərin təmizliyinin lazımı səviyyədə saxlanılması üçün bütün tədbirlər həyata keçirilir. Görülən işlər Bakı Şəhər İcra Hakimiyyəti tərəfindən ciddi nəzarətdə saxlanılır.